Vestland SV om dommen i Fjordsøksmålet. Vedteke av fylkesstyret 20. august 2025.
Ikkje ank saka, og stopp utsleppa i Førdefjorden!
Borgarting lagmannsrett har samrøystes kjent at utsleppsløyva og driftsløyva for mineralutvinningsprosjektet til Nordic Mining ved Førdefjorden er ugyldige.
Lagmannsretten slår fast at det ikkje var sterke nok grunnar til å fråvike at det ikkje er lov å redusere vasskvaliteten. Retten seier at det ikkje er dokumentert at mineralet rutil som skal utvinnast på Engebø i Sunnfjord kommune er eit kritisk viktig mineral. Og retten meiner at det langt frå er, eller har vore ein situasjon i kommunen med sterk nedgang i folketal og sosial naud.
Vestland SV meiner regjeringa ikkje må anke dommen i Borgarting lagmannsrett. Dommen er grundig og samrøystes. Staten har tapt på alle punkt. Retten slår også fast at det skal leggast stor vekt på kva EFTA-domstolen har uttala. EFTA-domstolen gav i byrjinga av mars støtte til Naturvernforbundet og Natur og ungdom sin tolking av EU sitt vassdirektiv. Lagmannsretten skriv i dommen at løyva til utslepp og drift er i strid med både EUs vassdirektiv og den norske vassforskrifta.
Vestland SV meiner regjeringa må respektere dommen, trekke løyva og alt no sørge for at Nordic Mining sluttar med utslepp – fram til det det er ein rettskraftig dom i denne saka. Det er avgjerande at regjeringa sikrar at dommen i lagmannsretten får konsekvensar for drifta til Nordic Mining. Noko anna vil undergrave tiltrua til rettssystemet og demokratiet.
Vestland SV ser på dommen som svært viktig for å verne Førdefjorden og anna urørt natur i framtida!
